| Sumario: | Dende finales del sieglu XIX los adelantos en fonética esperimental ufiertaron presees y metodoloxía pa estudiar les carauterístiques prosódiques de les llingües. Na primer época nun foi mui prestamosa l’aplicación d’estos avances por cuenta, principalmente, de que los estudios fonéticos centraben el so interés nos soníos aisllaos que nun llegaben a algamar unidaes superiores al fonema. D’otra parte, nun resultaba amañosa la integración de la interpretación de los enunciaos con parámetros físicos tan complexos como’l tonu, la duración y la intensidá. Por estes dos razones nun fueron munches –anque sí de gran valía delles– les aportaciones al estudiu de la prosodia de les llingües romániques hasta les caberes décades del sieglu XX.Si los estudios de prosodia se fixeron aguardar, el so inxertamientu nos atles llingüísticos allargóse hasta principios del sieglu XXI cuando Contini y Romano entamen el proyeutu AMPER pa la construcción d’un Atles Multimedia Prosódicu del Espaciu Románicu. Diez años dempués d’esta iniciativa disponemos de la primer publicación del atles –que sigue en construcción–, fechu con una metodoloxía homoxénea na que s’amiesten los principios de la fonética esperimental cola xeollingüística. Nesti estudiu tomaremos como referencia esti atles xeoprosódicu, y otros que fueron asoleyándose nos últimos años, p’amosar los modelos entonativos del asturianu nos enunciaos declarativos y nos interrogativos absolutos en contraste con otros modelos románicos (castellanu, gallegu, portugués, catalán, occitanu, italianu, friulanu y rumanu)
|
|---|
